विगतमा आएको विनाशकारी प्राकृतिक विपद् (बाढी र पहिरो) का कारण अर्बौँको क्षति बेहोरेर थिलथिल बनेको नेपालकै प्रमुख कृषि तथा पर्यटकीय गन्तव्य इलाम चालु आर्थिक वर्षको बजेटमा फेरि उपेक्षित बनेको छ।
देशकै प्रमुख अर्थतन्त्र र पहिचानसँग जोडिएका अग्र्यानिक चिया, दुग्धजन्य पदार्थ (ललिपप, छुर्पी, चिज), अलैँची र झुल्के घाम हेर्ने आन्तरिक तथा बाह्य पर्यटनको केन्द्र भए पनि संघीय बजेटले इलामको यो सामर्थ्य र पीडा दुवैलाई नजरअंदाज गरेको स्थानीय सरोकारवालाहरूले आरोप लगाएका छन्।
गएको वर्षको भीषण प्राकृतिक प्रकोपले इलामको जनजीवन, सडक पूर्वाधार (विशेष गरी मेची राजमार्ग) र ठुलो मात्रामा कृषियोग्य भूमि तहसनहस बनाएको थियो। विपद्पछिको पुनर्निर्माण र किसानहरूलाई राहत दिन ठुलो बजेटको आवश्यकता रहे पनि ‘विज्ञ’ अर्थमन्त्रीले ल्याएको बजेटले यस क्षेत्रलाई उचित सम्बोधन गर्न नसकेको भन्दै आक्रोश बढेको छ।
यसै सन्दर्भमा टिप्पणी गर्दै विश्लेषक निष्कल राई भन्छन्, “गत वर्षको विपद्बाट थिलथिल भएको इलामलाई विज्ञ अर्थमन्त्रीको बजेटले सुन्न सकेन।”
राज्यलाई अत्यधिक विदेशी मुद्रा आर्जन गराउने र आत्मनिर्भर कृषि अर्थतन्त्रको जग बसाल्ने इलाम जस्तो उत्पादनशील जिल्लालाई बजेटको प्राथमिकतामा नराख्नुले सरकारको समृद्धिको नारामाथि नै गम्भीर प्रश्न खडा गरिदिएको स्थानीय उद्योगी र जनप्रतिनिधिहरूको बुझाइ छ।
