मध्यपूर्वमा इजरायल, अमेरिका र इरानबीच सुरु भएको सैन्य टकरावका कारण विश्व बजारमा कच्चा तेलको मूल्यमा तीव्र वृद्धि हुन थालेको छ। पछिल्लो केही दिनयता भएका आक्रमण र प्रति-आक्रमणले तेल आपूर्तिमा गम्भीर अवरोध सिर्जना गरेपछि विश्लेषकहरूले तेलको मूल्य प्रतिब्यारेल १०० अमेरिकी डलर नाघ्ने निश्चितप्रायः रहेको चेतावनी दिएका छन्।
तेलको मूल्य बढ्नुको मुख्य कारण विश्वकै महत्वपूर्ण तेल मार्ग स्ट्रेट अफ हर्मुजमा उत्पन्न अवरोधलाई मानिएको छ। विश्वको कुल तेल आपूर्तिको झण्डै २० प्रतिशत हिस्सा यही साँघुरो समुद्री मार्ग भएर जान्छ।
इरानले हर्मुज जलसन्धि बन्द गर्न सक्ने धम्की दिएसँगै धेरै ठूला ट्याङ्कर कम्पनीहरूले यस क्षेत्रमा आफ्ना जहाज पठाउन बन्द गरेका छन्।युद्धको जोखिम बढेपछि जहाजहरूको बीमा शुल्क आकाशिएको छ, जसले गर्दा तेलको ढुवानी खर्च महँगो भएको छ।इरान र आसपासका क्षेत्रमा भएका पछिल्ला ड्रोन र मिसाइल आक्रमणले तेल उत्पादन केन्द्र र भण्डारण गृहहरूमा क्षति पुगेको रिपोर्टहरू सार्वजनिक भएका छन्।
आजको मितिसम्म ब्रेन्ट क्रुडको मूल्य प्रतिब्यारेल ८० डलरको आसपास पुगिसकेको छ। बार्कलेज (Barclays) र गोल्डम्यान साक्स (Goldman Sachs) जस्ता ठूला वित्तीय संस्थाहरूले यदि युद्ध अझै केही हप्ता लम्बिएमा यो मूल्य सजिलै १०० डलरभन्दा माथि पुग्ने प्रक्षेपण गरेका छन्।
