अछाम । अछाममा त्रिपालले बारेर बनाइएको छाउगोठमा पहिरो खस्दा दुई महिनावारी भएकी महिला र १ बालिका मृत्यु भएको छ ।
पञ्चदेवल विनायक नगरपालिका–८ सेलापानीस्थित चुरखुलीमा घर नजिकै खेतबारीमा त्रिपाल मुनि सुतिरहेका बेला पहिरोसँगै खसेको खसेको ढुङ्गा लागेर ३५ वर्षीया निमा खनाल र ७ वर्षीया बालिका कविता भण्डारीको घटनास्थलमै मृत्यु भएको प्रहरीले जनाएको छ ।
महिनावारी भएपछि गएराति निमा र मृतक बालिकाकी आमा रत्ना भण्डारी त्रिपालले बारिएको सोही छाउगोठमा सुत्न गएका थिए । कविता पनि आमासँगै सुत्न छाउगोठ गएकी थिइन् । ढुंगाले लागेर रत्ना पनि गम्भीर घाइते छिन् । उनको टाउकोमा चोट छ। उनलाई उपचारका लागि अस्पताल पठाइएको छ । मृतक खनाल र भण्डारी दुवै जना माइत आएका थिए ।
छाउगोठ घरबाट करिब ५० मिटरको दूरीमा रहेको प्रहरीले जनाएकाे छ ।
शुक्रबार बिहान ५ बजे अविरल वर्षापछि आएको पहिरोसँगै खसेको ढुंगाले लागेपछि कविता र निमाको घटनास्थलमै मृत्यु भएको हो ।
अछाममा छाउगोठ भत्काइए पछि महिनावारी भएकाहरुलाई त्रिपाल टाँगेर खेतबारीमा राख्ने गरेको पाइएको छ ।
