काठमाडाैँ । सञ्चार तथा सूचना प्रविधिमन्त्री पृथ्वीसुब्बा गुरुङले भ्रष्टाचारि जुससुकै ओहोदाको भएपनि कारबाही हुनुपर्ने र सरकारले भ्रष्टाचारीलाई कारबाही गर्ने बताएका छन् ।
बुधबार (असार ३२) बुधबार सिंहदरबारमा सञ्चारकर्मीको प्रश्नमा घुस प्रकरणमा राजीनामा दिएका एमाले सांसद राजकुमार गुप्ताका विषयमा प्रतिक्रिया दिँदै उनले यस्तो बताएका हुन् ।
निवर्तमान संघीय मामिला तथा सामान्य प्रशासनमन्त्री राजकुमार गुप्ताको अडियो प्रकरणबारे प्रश्नको जवाफ दिने क्रममा उनले मन्त्रीले नैतिकताका आधारमा राजीनामा दिइसकेको र नयाँ मन्त्री आइसकेको समेत उल्लेख गरे ।
उनले अब सरकारले अनुसन्धानको प्रक्रिया अघि बढाउने र दोषी देखिए कारबाही गरिने बताए ।
“सामान्य प्रशासनमन्त्रीले प्रश्न उठेपछि नैतिकताको आधारमा राजीनामा दिइसक्नुभएको छ । अर्को मन्त्री आइसक्नुभएको छ । यसमा छानबिन होला कि नहोला भन्ने प्रश्न छ । अघि बढ्दै जाला,” उनले भने, “तथ्य र सत्यमा आधारित भएर सरकार अघि बढ्छ । त्यस्तो छ भने सरकारले आँखा चिम्लिनुपर्छ भन्ने कुरा रहँदैन ।”
मन्त्री गुरुङले गल्ती गर्ने जोकोही भए पनि कारबाही गरिने बताए । “हामी सबै भ्रष्टाचारमुक्त नेपाल चाहन्छौँ । त्यसको लागि भ्रष्टाचार अन्त्य होस् भन्ने चाहन्छौँ,” उनले भने, “भ्रष्टाचारी मन्त्री होस् वा कुनै सचिव वा कोही पदाधिकारी, जो भए पनि त्यसमाथि कारबाही हुनुपर्छ भन्ने हामी सबैको माग हो ।”
