काठमाडौं – आइसिसी टी-२० विश्वकप एसिया एन्ड इस्ट एसिया प्यासिफिक छनोट खेलमा नेपालले जापानलाई ५ विकेटले पराजित गरेको छ।
ओमान क्रिकेट एकेडेमीमा भएको खेलमा नेपालले टस जितेसँगै ब्याटिङको निम्तो पाएको जापानले निर्धारित २० ओभरमा ८ विकेटको क्षतिमा १३१ रन जोड्यो। जापानका कप्तान केन्डेल काडोवाकी फ्लेमिङले ६० तथा इसाम रहमानले ३१ रन प्रहार गरेका थिए । उनीहरुबीच दोस्रो विकेटका लागि ८६ रनको साझेदारी भएको थियो।
नेपालका लागि गुल्सन झा र सन्दीप लामिछानेले २-२ विकेट तथा नन्दन यादव र सोमपाल कामीले १-१ विकेट लिए।
जापानले दिएको १३२ रनको लक्ष्य नेपालले ५ विकेटको क्षतिमा १८ ओभरमा पूरा गर्यो। नेपालका लागि ओपनरद्वय कुशल भुर्तेलले २१ रन र आसिफ शेखले ३८ रन बनाए। त्यसैगरी कप्तान रोहिकुमार पौडेलले १८ रन, गुल्सन झाले २८ रन र दीपेन्द्रसिंह ऐरीले १४ रन बनाए ।
जापानका शोमा स्लेटरले २ विकेट लिए ।
दुवै टोली यसअघि नै सुपर-६ मा पुगिसकेका छन्। आजको जितसँगै नेपालले सुपर-६ मा दुई अंक जोडेको छ।
