काठमाडौं । मकवानपुरको हेटौंडा उपमहानगरपालिकाको गैरीगाउँमा शुक्रबार दिउँसो भासिएर जमिनमुनि हराएकाे गुडिरहेको बोलेरो पिकअप भ्यान अझै भेटिएकाे छैन । दुई दिनसम्म खोज्दा पनि गाडी नभेटिएपछि आइतबार सशस्त्र प्रहरीको टोलीलाई बोलाएर गाडी खोज्ने काम भइरहेको छ ।
हेटौंडा उपमहानगरपालिकाको वडा नम्बर १६ र १७ जोडिएको गैरीगाउँको भित्री कच्ची सडकमा शुक्रबार दिउँसो गाडी भासिएकाे हाे । भासिएर हराएकाे ना ४ च ४८३३ नम्बरको सिंगल क्याब पिकअप गाडी स्थानीय हरिराम राईको हो । गाडीमा घाँस काट्ने मेसिन रहेकाे थियाे ।
गाडी भासिएको त्यो ठाउँमा अहिले ठूलो खाल्डो परेको छ । खाल्डो धमिलो पानीले भरिएको छ ।
गाडी भासिएको सडकको दायाँ–बायाँ माछापालन पोखरी छन् भने सडककै छेउँमा पानी तान्ने बोरिङ गाडिएको छ ।
अहिले बाटो बनेको र दायाँबायाँ पोखरी बनेको ठाउँ पहिले दलदल भएकाे र पहिले गोरु पनि हराएकाे स्थानीयले बताएका छन् ।
गाडी हराएको घटनाबारे छलफल गर्न दुई दिनपछि हेटौंडा उपमहानगरपालिकामा विपद व्यवस्थापन समितिको बैठक बोलाइएको छ ।
