काठमाडौं । युरोपको प्रतिष्ठित क्लब फुटबल प्रतियोगिता युइएफए च्याम्पियन्स लिग अन्तर्गत क्वार्टरफाइनलको दोस्रो लेगमा जर्मन क्लब बायर्न म्युनिखले स्पेनिस दिग्गज रियल म्याड्रिडलाई ४–३ गोलले पराजित गर्दै सेमिफाइनलमा स्थान सुरक्षित गरेको छ।
अत्यन्त रोमाञ्चक खेलमा बायर्नले समग्रमा ६–४ को अग्रता बनाउँदै प्रतियोगिताको अन्तिम चारमा प्रवेश गरेको हो। खेलको सुरुवातदेखि नै दुवै टोलीले आक्रामक प्रदर्शन गरेका थिए र पटक–पटक स्कोर परिवर्तन हुँदा दर्शकहरू उत्साहित बनेका थिए।
बायर्नकालागि पाभ्लोभिच, ह्यारी केन , लुइस डियाज र माइकल ओलिसेले समान १–१ गाेल गरे । त्यस्तै म्याड्रिडका लागि अर्दा गुलरले २ र केलियन एमबाप्पेले १ गाेल गरे ।
निर्णायक क्षणहरूमा बायर्नका खेलाडीहरूले उत्कृष्ट प्रदर्शन गर्दै अन्तिम समयमा महत्त्वपूर्ण गोल गरेका थिए, जसले खेलको नतिजा उनीहरूको पक्षमा मोड्यो। खेलको क्रममा रियल म्याड्रिड दबाबमा देखिएको थियो र एक खेलाडी रातो कार्ड पाउँदा टोली झन् कमजोर बनेको थियो।
यस हारसँगै रियल म्याड्रिडको यस सिजनको च्याम्पियन्स लिग यात्रा समाप्त भएको छ भने बायर्न म्युनिखले अब सेमिफाइनलकाे पहिलो लेग अप्रिल २८ (मंगलबार) मा फ्रेन्च क्लब पिएसजीसँग खेल्नेछ ।
अर्को खेलमा आर्सनलले स्पोर्टिङ क्लबसँग गोलरहित बराबरी खेल्दै सेमिफाइनलमा स्थान सुरक्षित गरेको छ। पहिलो लेगमा काइ हाभर्ट्जले गरेको एक मात्र गोल आर्सनललाई अन्तिम चारमा पुर्याउन पर्याप्त बन्यो। आर्सनलले अप्रिल २९ (बुधबार) एथ्लेटिको म्याड्रिडसँग सेमिफाइनलकाे पहिलो लेग खेल्नेछ ।
