छिमेकी राष्ट्र भारतको उत्तर प्रदेशमा बुधबार आएको विनाशकारी हावाहुरी, मुसलधारे वर्षा र चट्याङका कारण कम्तीमा ५६ जनाको मृत्यु भएपछि त्यहाँको जनजीवन पूर्णतः अस्तव्यस्त बनेको छ।
भारतीय समाचार एजेन्सीका अनुसार उत्तर प्रदेशका प्रयागराज, भदोही र फतेहपुर लगायतका ३० भन्दा बढी जिल्लाहरू यो प्राकृतिक विपत्तिबाट गम्भीर रूपमा प्रभावित भएका छन्, जहाँ प्रयागराजमा १७, भदोहीमा १६ र फतेहपुरमा ९ जनाले ज्यान गुमाएका छन्।
प्रतिघण्टा ८० किलोमिटरभन्दा बढीको रफ्तारमा चलेको भीषण हावाहुरीले सयौं रुख र बिजुलीका पोलहरू ढाल्दा धेरैजसोको मृत्यु घरको पर्खाल भत्किएर र रुखले थिचिएर भएको छ। यस दुःखद घडीमा उत्तर प्रदेशका मुख्यमन्त्री योगी आदित्यनाथले मृतकका परिवारलाई तत्काल राहत उपलब्ध गराउन र घाइतेहरूको प्रभावकारी उपचार सुनिश्चित गर्न कडा निर्देशन दिनुभएको छ।
मौसमको यो कहर उत्तर प्रदेशमा मात्र सीमित नभई राजस्थानमा पनि ‘आगो’ बर्सिए झैँ अनुभव भइरहेको छ, जहाँ भारतीय मौसम विज्ञान विभागले चरम गर्मीका कारण ‘रेड अलर्ट’ जारी गरेको छ। राजस्थानको बाडमेरमा तापक्रम यो सिजनकै उच्च ४८.३ डिग्री सेल्सियस सम्म पुगेको छ भने मौसमविद्हरूले मे १९ सम्म राजस्थान, दिल्ली र उत्तर प्रदेशका विभिन्न भागमा ‘लू’को स्थिति अझै भयावह रहने चेतावनी दिएका छन्। यसैबीच, मौसम विभागले आगामी २४ घण्टाभित्र उत्तर प्रदेशका ५० भन्दा बढी जिल्लाहरूमा फेरि तीव्र हावाहुरी र चट्याङसहितको वर्षा हुनसक्ने भन्दै ‘एल्लो अलर्ट’ जारी गरेको छ भने उत्तराखण्ड र हिमाचल प्रदेशका पहाडी क्षेत्रमा समेत असिनापानीको सम्भावना रहेको भन्दै सर्वसाधारणलाई उच्च सतर्कता अपनाउन आग्रह गरिएको छ।
