कम्बोडियामा आकर्षक रोजगारीको प्रलोभनमा परेर पुगेका २३३ जना नेपाली एक बन्द कोठाभित्र अत्यन्तै कष्टकर अवस्थामा बन्धक बनाइएको जानकारी प्राप्त भएको छ। पीडितहरूका अनुसार उनीहरूलाई एउटै कोठाभित्र “जनावरलाई जस्तै खाँदेर” राखिएको छ र त्यहाँबाट बाहिर निस्कन दिइएको छैन।
बन्धक बनाइएका नेपालीहरूले आफ्ना परिवार र सामाजिक सञ्जालमार्फत पठाएको सन्देश अनुसार, त्यहाँ पुग्ने बित्तिकै रोजगारदाता भनिएका व्यक्तिहरूले उनीहरूको मोबाइल, नगद पैसा र राहदानी समेत जफत गरेका छन्। बाह्य संसारसँग सम्पर्क विच्छेद गराएर उनीहरूलाई मानसिक र शारीरिक यातना दिइरहेको बुझिएको छ।
पीडितहरूले नेपाल सरकार, परराष्ट्र मन्त्रालय र बैंककस्थित नेपाली दूतावासलाई आफूहरूको ज्यान जोगाइदिन र तत्काल उद्धारको पहल गरिदिन रुँदै आग्रह गरेका छन्। पछिल्लो समय कम्बोडिया, लाओस र म्यानमार जस्ता देशहरूमा ‘अनलाइन स्क्याम’ र अवैध क्यासिनोमा काम लगाउने भन्दै नेपाली युवाहरूलाई तस्करी गर्ने गिरोह सक्रिय रहेको पाइएको छ।
