धादिङ क्षेत्र नम्बर १ बाट राष्ट्रिय स्वतन्त्र पार्टी (रास्वपा) की उम्मेदवार आशिका तामाङको उम्मेदवारी खारेज भएको भनी सामाजिक सञ्जालमा फैलिएको हल्ला सत्य नभएको निर्वाचन आयोगले स्पष्ट पारेको छ। उम्मेदवारी फिर्ता लिने समय सीमाभित्र तामाङको नामबाट ‘फर्जी’ इमेल पठाइएपछि यो अन्योल सिर्जना भएको थियो।
निर्वाचन अधिकृतको कार्यालयका अनुसार, कसैले आशिका तामाङको नाम र नक्कली इमेल प्रयोग गरी उम्मेदवारी फिर्ता लिन निवेदन पठाएको थियो। तर, तामाङले स्वयं उपस्थित भएर आफूले त्यस्तो कुनै निवेदन नदिएको र आफ्नो उम्मेदवारी कायमै रहेको स्पष्ट पारेकी छन्। निर्वाचन आयोगका प्रवक्ताले धादिङ-१ मा तामाङको उम्मेदवारी विधिवत् रूपमा कायम रहेको र उनी चुनावी प्रतिस्पर्धामा रहेको पुष्टि गरेका छन्।
आशिका तामाङले पनि आफ्नो आधिकारिक फेसबुक पेजमार्फत “आफू चुनाव जित्न मैदानमा उत्रिएको र यस्ता षड्यन्त्रकारी हल्लाको पछि नलाग्न” मतदाताहरूलाई आग्रह गरेकी छन्। उनले आफ्नो इमेल दुरुपयोग गर्नेविरुद्ध कानुनी प्रक्रिया अगाडि बढाउने समेत बताएकी छन्। विदेशी आवासीय अनुमति (PR) रहेको भन्ने आरोपको खण्डन गर्दै उनले आफूसँग केवल नेपाली नागरिकता र राहदानी रहेको र आफू पूर्ण रूपमा योग्य उम्मेदवार रहेको दाबी गरेकी छन्।
