नेपालले टी-२० विश्वकप २०२६ को आफ्नो पहिलो खेलमा बलियो टोली इङ्गल्याण्ड विरुद्ध देखाएको प्रदर्शनले विश्व क्रिकेटकै ध्यान खिचेको छ। मुम्बईको वांखेडे स्टेडियममा इङ्गल्याण्ड जस्तो विश्व विजेतालाई अन्तिम बलसम्म दबाबमा राखेर केवल ४ रन ले पराजित हुनु नेपालको लागि हार भए पनि नैतिक रूपमा ठुलो जित थियो।विश्व विजेता इङ्गल्याण्डलाई अन्तिम बलसम्म निकै कडा टक्कर दिएको नेपालका लागि यो खेल ऐतिहासिक ‘सुपर-८’ मा पुग्ने आशा जीवित राख्न निर्णायक हुनेछ।
पहिलो खेलमा स्कटल्याण्डसँग लज्जास्पद हार व्यहोरेको र आफ्ना मुख्य खेलाडी चोटका कारण गुमाएको इटाली विरुद्ध नेपालले केवल जित मात्र होइन, ठूलो अन्तरको जित निकाल्ने रणनीति बनाएको छ।कप्तान रोहित पौडेलले भनेझैँ नेपालले कुनै पनि टोलीलाई हल्का लिने छैन। तर, इटालीको हालको फर्म हेर्दा नेपालले टस जितेर पहिले ब्याटिङ गरेमा २०० भन्दा बढीको विशाल स्कोर बनाएर इटालीलाई सस्तैमा समेट्ने रणनीति लिन सक्छ। यसले नेपालको रन-रेट यति बलियो बनाउनेछ कि आगामी खेलहरूमा स्कटल्याण्ड वा वेस्ट इन्डिजलाई पछि पार्न सजिलो हुनेछ।
नेपालको पक्ष
उच्च मनोबलस् इङ्गल्याण्ड विरुद्धको सनसनीपूर्ण प्रदर्शनले नेपाली खेलाडीहरूमा उच्च आत्मविश्वास भरेको छ। कप्तान रोहित पौडेल, दीपेन्द्र सिंह ऐरी र लोकेश बम जस्ता खेलाडीहरू उत्कृष्ट फर्ममा देखिएका छन्।
वांखेडेको होम ग्राउन्ड अनुभव मुम्बईमा खेल्दा नेपालले घरेलु मैदानकै जस्तो दर्शकको साथ पाइरहेको छ। इङ्गल्याण्ड विरुद्धको खेलमा १७ हजार भन्दा बढी दर्शकको समर्थनले नेपाली टोलीलाई थप ऊर्जा प्रदान गरेको छ।
सन्तुलित टोली नेपालसँग ब्याटिङ र बलिङ दुवैमा राम्रो विकल्पहरू छन्। विशेषगरी स्पिन विभागमा नेपाल इटाली भन्दा धेरै बलियो देखिन्छ।
नेपालका चुनौती
अन्तिम ओभरको फिनिसिङ: इङ्गल्याण्ड विरुद्धको खेलमा जितको नजिक पुगेर पनि फिनिसिङमा चुकेको पाठ नेपालले सिक्न जरुरी छ। डेथ ओभरमा सटिक बलिङ र ब्याटिङमा थप जिम्मेवारी आवश्यक छ।
अन्डरडगलाई हल्का लिने जोखिम: इटाली आफ्नो पहिलो खेलमा स्कटल्याण्डसँग ७३ रनको ठुलो अन्तरले पराजित भएको भए पनि उनीहरूमा केही प्रतिभाशाली खेलाडीहरू छन्। नेपालले उनीहरूलाई कमजोर ठान्ने गल्ती गर्नु हुँदैन।
इटालीको अवस्था
इटालीका लागि पहिलो खेल सुखद रहेन। स्कटल्याण्ड विरुद्धको खेलमा २०७ रनको विशाल लक्ष्य पछ्याउने क्रममा उनीहरू १३४ रनमै समेटिए। साथै, उनीहरूका कप्तान वेन म्याड्सन काँधको चोटका कारण यो खेलमा उपलब्ध हुने सम्भावना न्यून छ, जसले इटालीलाई थप दबाबमा राख्नेछ। यद्यपि, बेन मनेन्टीले पहिलो खेलमा अर्धशतक प्रहार गर्दै आफ्नो क्षमता देखाइसकेका छन्।
नेपालले के अपेक्षा गर्न सक्छ? मुम्बईको पिच ब्याटिङका लागि अनुकूल छ। यदि नेपालले पहिले ब्याटिङ गरे १८०+ को योगफल तयार गर्न सकेमा इटालीलाई रोक्न सहज हुनेछ। स्पिनरहरूका लागि यो पिचले केही मद्दत गर्ने हुँदा सन्दीप लामिछाने र कुशल भुर्तेलको भूमिका निर्णायक हुन सक्छ।
