२० देखि ३५ वर्ष उमेर समूहकाले मात्रै डिम्ब र शुक्रकीट दान गर्न पाउने

काठमाडौँ । पछिल्लाे समय १८ वर्षमुनिका किशोरीहरूको डिम्ब झिक्ने र बिक्री–वितरण गर्ने गरेकाे कुरा बाहिरीएपछि सरकारले ‘निःसन्तान व्यवस्थापन सेवा सञ्चालनसम्बन्धी मापदण्ड, २०८२’ तयार पारेको छ  । आइभिएफ (इन भिट्रो फर्टिलाइजेसन) सेन्टरहरूमा हुँदै आएको अवैध कारोबार र बदमासी रोकी डिम्ब तथा शुक्रकीट दान व्यवस्थित गर्न मन्त्रालयबाट तयार पारिएको मापदण्डलाई शुक्रबार स्वास्थ्य तथा जनसंख्यामन्त्री प्रदीप पौडेलले शुक्रबार स्वीकृत गरेका हुन् ।

मापदण्डको अनुसूची ९ को दफा ८ को (क) मा डिम्ब र वीर्य दानसम्बन्धी व्यवस्था छ, जसमा डिम्ब र वीर्य दान गर्ने व्यक्तिले पूरा गर्नुपर्ने मापदण्ड तोकिएको छ ।

नयाँ मापदण्डअनुसार २० देखि ३५ वर्ष उमेर समूहकाले मात्रै डिम्ब र शुक्रकीट दान गर्न पाउनेछन्  । साथै अब आइभिएफ सेवा प्रवाह गर्ने स्वास्थ्य संस्थाहरूको शुल्क मन्त्रालयले तोक्नेछ ।

स्वीकृति भएसँगै उक्त मापदण्ड कार्यान्वयनमा आएको मन्त्रालयका प्रवक्ता डा. प्रकाश बुढाथोकीले बताए  ।

डिम्ब दानसम्बन्धी मापदण्ड

एक डोनरले ६ पटक मात्र डोनेसन गर्न मिल्ने
डोनेसनको अवधि कम्तीमा तीन महिनाको फरक हुनुपर्ने
डोनरको परिचय प्रापकलाई सुनाउन नमिल्ने
डोनरको उमेर २० देखि ३५ वर्षको हुनुपर्ने
डोनरको शारीरिक स्वास्थ्य परीक्षण गर्नुपर्ने
कुनै सरुवा रोग नभएको हुनुपर्ने
परिचयपत्र रेकर्ड राख्नुपर्ने
डोनेसन गर्ने समयको पछिल्लो तीन महिनाको आधारभूत परीक्षण रिपोर्ट अनिवार्य पेस गर्नुपर्ने
डिम्ब दान गर्ने व्यक्तिलाई सम्पूर्ण कुरा बुझाई मन्जुरीनामा लिनुपर्ने
विवाहितको हकमा श्रीमान्को मन्जुरी हुनुपर्ने
कुनै पनि व्यक्तिलाई प्रलोभनमा पारी डोनेसन दिन बाध्य पार्न नपाइने