काठमाडौँ । धरान उपमहानगरपालिकाका मेयर हर्क साम्पाङ राईले बजेट जति सबै चितवन महानगरपालिकामा खन्याइदिएर विभेद गरेकाे भन्दै मेयर रेनु दाहाललाई सामाजिक सञ्जालमार्फत जवाफ फर्काएका छन् ।
धरानका मेयर राईले ठूला योजना गर्नुपर्थौ भन्ने भरतपुर महानगरपालिकाकी मेयर रेनु दाहालको अभिव्यक्तिमा धरानका मेयर राईले ‘तपाइको बाऊ प्रधानमन्त्री हुँदा सप्तकोशीको पानी ल्याउन पैसा मागेको २० लाख मात्रै छुट्याइदियो, … तपाईंको बाउ ठिक रहेनछन्’ भन्दै जवाफ फर्काएका हुन् ।
दाहालकै पार्टीका सुदन किराती मन्त्री हुँदा आफूले एयरपोर्ट मागेको तर प्रधानमन्त्री दाहालले ‘विराटनगरमा छँदैछ किन चाहियो धरानमा’ भनेर फर्काइदिएकोसमेत राईले लेखेका छन् ।
दाहाल प्रधानमन्त्री हुँदा बजेट जति सबै आफ्नै छोरीको पालिकामा मात्रै खनाइदिएर विभेद गरेको आरोप पनि लगाएका छन् ।
साथै उनले नेकपा माओवादी श्रम र श्रमिकलाई अपमान गर्ने अभिव्यक्ति दिने सामन्त र दलाल, पूँजीपतिहरुको पार्टी बनिसकेकाे जिकीर समेत गरेका छन् ।
उनले लेखेका छन्, ‘रेनु दहालले मलाई ठुला योजना गर्नु पर्थौ भनेर भनेछ ! रेनुजी तपाइँको बाऊ प्रधानमन्त्री हुँदा सप्तकोशीको पानी ल्याउन पैसा मागेको २० लाख मात्रै छुट्याइदियो त मैले के गर्ने ? बाऊ ठिक रैन छ पार्टी ठिक रैछ त ! एयरपोर्ट मागेको तपाइँकै पार्टीको सुदन किराती मन्त्री थिए र तपाइँकै बाऊ प्रधानमन्त्री थिए, बिराटनगरमा छँदैछ किन चाहियो धरानमा भने ! अहिलेका पार्टी ठिक्छैन रैछ कुनै पनि विभेद गर्छ ! तपाइँको बाऊले नि प्रम हुँदा बजेट जति सबै तपाईंकै पालिकामा मात्रै खनाइदिएर विभेद गरे ! अब ८४ मा म आफै आएर गर्नु पर्ला त्यो ठाउँमा भन्दैछु ! बालेन जीको कुरा नगर्नु वहाँको बजेट २६ अर्ब माथिछ ! पैसा २०% पनि खर्च गर्न सक्दैन त्यो महानगरले ! बिना पैसा पनि बिकास कसरी गर्न सकिन्छ ! जनताको शक्तिलाई ढुङ्गा हान्न, भएको संरचना भत्काउन र मान्छे मार्नमा होइन देश निर्माणमा कसरी जोड्न सकिन्छ भन्ने कुरा सिक्न म कहाँ आउनु ! भिजन भनेको के हो त्यो म सिकाउँछु ! विदेशी ऋण बोकेर धेरै ठूलो गाडी हाँक्नु हुँदन ! स्वदेशी उत्पादनमा जोड दिनु पर्छ ! यो हो भिजन ! बिचरा तपाइँलाई के थाहा श्रम र श्रमिकलाई अपमान गर्ने अभिव्यक्ति दिने तपाईंहरुको पार्टी सामन्त र दलाल, पूँजीपतिहरुको पार्टी बनिसक्यो भन्ने ! बिचरा…’
